Osnovna škola "Grohote" Grohote

BABA I INTERNET

Ni babe nisu više šta su nekad bile. Priča mi mater kako su se prije stare žene okupljale na šentadu isprid stare peškarije i po cile dane plele, oli kuverte za pokrit postelju, oli miljete koje su stavljale na svoje drvene kredence, oli su raspravljale i kudile suside i dicu. A danas, danas vam babe idu na Internet. Ona moja po dvi ure sidi za kompjuteron. Proučila je svu botaniku, pročitala ijadu recepat, zna sve o svim bolestima, sve ih je našla na Internet. Ako koga ne sladi, samo pita babu šta mu je, i ona ka pravi pravcati likar da odgovor iz prve ruke. Bože moj, ona van se u sve razumi. Jadan moj dida ne smi ni progovorit, ona ga odma poklopi: ''Nije tako, nemaš pojma ja san sve to pročitala na guglu.'' Onda dida poludi: ''Skroz si rebambila, luđi je oni ko ti je da tu škatulu, sve to triba zajtit kroz ponistru.'' I tako iz dana u dan. Sad smo svi u problemima, baba nam je postala prava ovisnica. Ne ji, ne pije, ne izlazi iz kuće, sad je još i fejs napravila. Otac mi se skroz zabrinija, a ni materi nije sve jedno. Potražili smo pomoć kod susida Ive. Nadali smo se da će nam on šta pametno reć, a kad ono i njegova mater po cile dane visi na kompjuteru, i stara Tone iz Pasika i baba Domina, teta Luce i ko bi zna, cili grad.

Babe stvarno nisu šta su nekad bile.

Karmela Ciciliani, 6. razred

Mentor: Nađa Mikelić

OŠ Petar Berislavić, Trogir