Osnovna škola "Grohote" Grohote

Tega istega dana banili su nan u kuću nono i nona. Jooo, ča smo bili sritni!

Ni mi bilo druge vengo š njima poć na more. Boje da nisan znala ča me čeka jerbo bi me odma afanalo!

Cilin puten nono je grinta na furešte. Pribotunava jin je ča se trackadu onin kreman protiv sunca pa činidu šporkicu po moru. Strašno ga je činilo nervožastin i to ča ga ništa ne razume dok jin lipo besidi.

Nona ga je brenzavala niko vrime i sve se ufala da će kalmat. Ma kad se štufala, nabila je lipo očale o sunca na nos i iz dišpeta činila fintu da ga ne poznaje.

Incukala san se kad san vidila koliko je svita bilo na moru!

I tu isprid svih, mrtav - ladan, nono se skinija u mudantine i pokaza svoja dva šćapa od nog jušto ka dva bakalara.

Nona je na suncu bliščila ka lanterna radi bračoleti dok je mavala ventulon većon od moga šugamana za doć do arje.

E, ma to ni sve jerbo su se počeli kokolavat s menon i študirat me na peci-bokune. Nono se inamorava  u  moje  prste od nog,  a nona u moje bublaste obraze jerbo su, govorili su i jedan i drugi, isti njiovi!

Gledala san ih inšempjano i mislila: ”A Gospe moja, nisan ni znala da san baš tako gruba!”

Srićon, nona je počeja blesirat niki komarac. Pokuša ga je smečit pa je, vatajući ga, sam sebi opalija pest i bisno reka: “Tovar, da bili tovar!“

Nisan odma svatila komu govori, bidnoj beštiji ča je šumpreša u jednome potezu oli samome sebi.

Inšoma dela šoma, najsritnija san bila kad je nono finalmente reka noni: “Finili su, Mare, bali… ajmo, kupimo se, gremo doma!”

Nina Maglov, 3. razred

Mentor: Nikica Sikirica

OŠ Lučac, Split