Osnovna škola "Grohote" Grohote

Doli me, zna san, čeka moj dobri nono Tonći. Pita san se ča će me ovega lita naučit. Ča će lipega ovega puta smislit.

Čin san stiga, dočeka me s ričima: „Mali, ovega puta bi bi red da naučiš lovit ribu.˝ Bija san puno sritan i jedva san čeka kad ćemo započet.

Nono mi je reka da je najlakše naučit lovit ciple jerbo se oni love s kraja, s mula isprid kuće.

„Najpri moraš naučit nadit ješku na udicu , reka je nono. „Za ciple je najboja  ješka stari kruv. Malo ga smokriš i eto ti ješke.“

Učini san kako je reka i bacija krenu u more. Prvega puta mi je udica zadila za dno pa san je mora očetavat. Drugega puta san osta brez udice. Cipal je bija zagriza, ma mi je, dok san ga izvlačija, ispa s udice.

Posli tega san van, svitu moj, izgubija svaku voju. Reka san nonu da ću drugega puta poć u ribolov - na peškariju! U manje vrimena i s manje muke donit ću doma cili pajer ribe.

A nono mi je kaza: „Oštije ti, mali, tako se riba lovi u Splitu, a ne na škoju!

I tako san van ja, judi moji dragi, osta Splićanin, ako razumite ča san hoti s tin reć.

Kristijan Tomić, 3. razred

Mentor: Nikica Sikirica

OŠ Lučac, Split