Osnovna škola "Grohote" Grohote

Ča se tiče ovega „modernoga" tu ne ću puno palamudit, vako san van  ramandana cila po vome pitanju.

Ne bi tila ispast sad neka ča to puno brontulaje, al mi ne dolazi do ušiju kako triba govorit tin standardnin govoron. Čakavica je naš lipi dalmatinski govor, a oli i to nije hrvatski?  Nego ča je, pitan je vas?  Ima pet stotin godin naš Marulić je pisa najlipje libre, ma pod ruku je moga i sa otin poznatin Šespiron! Kad promislin boje, oli čakavski govor ne more bit bokun „standardniji“ samo da ga  višje promiču?

Ma, evo sad ću reć ča me najvišje smeta. To ča si prij moga čut čovika na televiziju kako lipo govori čakavicu, i cile emisije! Nema tega višje. A  kad čakavac govori to van izajde ka nika lipa pisma ča je Runjić napisa. I da se jušto bokunić čuje toga našega lipega govora, ma je li to sramota, oli ča? Eeeeee… Vengo, niki dan san čula na televiziju nikoga staroga ribara ča se žali ča ne more panulavat jerbo će ga policjoti oli inšpektorati kaznit.

Zakon da mu brani ribu iz mora škapulavat pa sve uzdiše u Županijsku panoramu oli u Dnevnik. Gleda u nebo, a plače u  more. Cili je život sa svojin starin odija na more i svojega je sina tako bi nauči. Di gre ovi ludi svit? Dalamtinac pa de ne more kapulat bokun ribe iz mora za svoju fameju. Eto, kad čuješ čakavicu, samo plačedu judi… A ja? Ja plačen i staroga i čakavicu. Ča je najžalosnije i ča me najviše bacila. Bojin sa da za dvadeset  godin u Splitu ne će ostat ni bokun ovega našega lipega govora, dokle ćemo durat? Dokle, pitan ja vas? 

Projdite danas kalon pa poslušajte kako judi govoridu. Čuješ stranjski govor, mulci palamudu ništo po modernu i eto nas, di smo? Nidir.

Vengo, isto mi daje nadu kad čujen kako i mladi svit u ovomen našen Pričiginu lipo govori pa sve pensan da ni još sve izgubjeno. Moremo  još učinit našega Marula da se nan ponosi!

Ivana Šimundić, 7. razred

Mentor: Katarina Piveta Vidučić

OŠ  Split 3, Split