Osnovna škola "Grohote" Grohote

IZGUBJENO  DITE

Ja van gren u jednu puno lipu i dobru skulu, skulu Lučac. Ma prin ove skule odi san u jednu drugu. Mater me tamo upisala jerbo je ta skula taman priko puta naše kuće.

 Kad se sitin... baš je bilo lipo odit tamo...ka da i ni skula. Nikor ništa ni učija vengo smo se utrkivali, bižali po dvoru i igrali na vatalo.

Meni je baš bilo lipo! Puno san gušta tamo, ma mi materi to nikako ni bilo pravo.

Jednega dana, kad je došla po mene za poć doma, ni me našla onod di san triba bit. Počela me tražit svugdi: po učionican, po koriduriman, izad velikih pitara punih cvića, po dvoru, okolo skule... Bome ni meštrovica ni znala di san. Mater je uvatila panika; trkala je ka luda svugdi okolo da me najde!

Kad me napokon našla, oni njen straj se pritvorija u bis. Ni birala ni misto ni vrime. Tako mi je, isprid one puste dičurlije, odalamila dvi po guzici da tu sramotu nikad u životu neću moć zaudobit!

Ma zato jon se danas, na račun tega, uvik javin di san i kad ću doć doma.

A ča se skule tiče, brzo me, da ni brže mogla, primistila u drugu skulu, u onu ča san van je već spomenija, u skulu Lučac. Rekla mi je da je skula za lavorat i učit, a ne za radit monade.

                    I sad san sritan. Sto puti mi je boje!