Osnovna škola "Grohote" Grohote

GALETINE

 Ne, nisu naši stori bili škrti, kako se potvoro nos Bročane. Bili  su šparenjuoži i neka su bili siromasi, uvik su ništo imali u sakrietu za nenodone prijateje i špežote.

Tako je jedonput mater spriemila škatulu  galetinih u armerun iza lancunih da ne nojdedu dica. Galetine su za počastit kogaguod (ne koga bilo) kal duojde u vižite.

Nojstarijo ćier, Dina, ponala je mater kako sakrije škatulu.

Znala je dobro da je ne smi dirat, ali glodne oči nisu muogle gledot u tu divotu i prsti su somi otvorili škatulu.

Uziela je jednu galetinu i zavećala se da već nieće. Ali  sutradon opet ni muogla odolit.

Govorila je somon sebi: „ Nieću više, gruom me ubi!“ Zavećovala se i somu sebe ružila, ali galetine su je momile iz armeruna i ona bi se zakliela da su some izahodile iz škatule i nudile njon se i ona hi je jila... jila.  

 A baš tuo popuolnie na vrota se prizento šjor Košta, paruon ol vapora. To je fini čovik kojemu ne fali ni tičjega mlika, ali koji se denjo svakoga, po di nieće svuoga prijateja iz ditinstva, Dininega oca.

Mater mu se obradovola: „O, šjor Tonči, šjor Tonči, pasajte naprid. Drago mi vas je vidit, sal ću ja zvat Matu, bi se iša malo naslonut jer je ol jutra kopa.“

 Šjor Košta ni ti dat da se Motu budi. Ali mater je rekla da mu je već ura za ustat se. Uto je i Mote indivino na vrota: „Eeee, Tuonči, prijateju muoj, dobro mi duošo, kako si", pozdravi je Tuončeta.

 "A če vo? Kako vo nimo ničega na stolu. A, Momica! Doj vamo …. obid, vino, vodu, moća“, zapovidi je ženi.

 Žena se inšenpijala i uzlepećala. Ni znala če bi pri ponudila, kafu, bevondu, pršuta, sira ... Kal ni ti ničega, jerbo da je već obidvo, pridložila je:

 “A, morate bare suzu prošeka gucnut i usupat dvi galetine.“

 Šjor Košta je olgovori:

„Ala, onda galetine i prošeka, toliko da se već ne ludiš.“

 Išla mater u komoru, prima armerunu i prpo ... prpo, duokle ni nošla onu škatulu. Ništo njon se čini laguhna. Otvoro je i ostane inkantona.  Škatula prozna.

Ča će sada? Znala je ona ko je to skroji.

 „A, Dina, brzo, vamo dojdi. Brzo, vraga izila da izila u svakon gnjidi! Oprosti mi Bože, ča na mene čini govorit!

Obružit ću se isprid čovika. Evo ti pineze, poj u stari otel i kup druge galetine! I da si pri vamo nego tamo, a posli ćeš ti meni ogrist! Ulovit ćeš ča te gre, ovega mi zlamena“, lampala je očima prima ćeri.

 Dina je polbila pineze i zatrkala se pul puorta. Ma čo trkala, letila. Donila je galetine i sakrila se dokle materi paso prvi jid. A onda je, za ulizat se, počiela fregat skale.

Fregala hi je, fregala, dokleguod nisu bile čiste ko sunce.

Kal je mater ugledola skale kako se bilidu, ni imala kuraja za kaštigat ćier,  nego njon je rekla da to već nikal, i za nikal, ne bi učinila jer da nieće drugi put vako lišo pasat.