Osnovna škola "Grohote" Grohote

ĆAKULA 

( Pričagin, 2012. )

IVAN: Jo meni, ženooo, di si? Vamo hodi. Puknut će mi srce od straja.

JULIA: Ive moj, ča ti se dogodilo? Gospe moja, inkolpat će ga. Evo ti bokun vode da dojdeš sebi. Ča          ti je, govori višje?

IVAN: Iša san put doma i odjednom kraj grobja izleti viščica.

JULIA: Ma kakva viščica, Bože prosvitli ga. Ča to govoriš?

IVAN: Lipo sam ti reka, VI-ŠČI-CA. Stvorila se pri da me, raščupanih vlas u biloj spavačici. Umra san od straja.

JULIA: Ive moj, ja te puno volin, ali s tebon ni sve u redu.

IVAN: Ajme, sad san se sitija. Je san  šempjast. Pričaju judi po selu da je kuma Luce meštra Pjera porebambila i da digod šeta u snu.

JULIA: Evo je baš gre put nas. Sa` ću vidit je li porebambila ona ili ti skupa s ćakulan u selu. Evala kuma Luce. Ča ima?

LUCE: A koja je ura? Nima mi Pjera.

JULIA: Šest uri ujutro. Bi` će ti Pjer iša u poje.

LUCE: Otkad se u noć gre u poje.

JULIA: Ma kuma Luce, je si ti dobro? Šest uri je U-JU-TRO.

LUCE: Ča je, oš reć da san luda, vi ste svi mačani.

PIJER: Rusulice moja, evo me. Jesi popila lik?

LUCE: Ludega svita i moj Pjer je porebambi.

IVAN: Kuma Luce fermaj, pripala si me.

LUCE: Di si ti mene vidi?

IVAN: Prid zoru si šetala po grobju u biloj spavačici.

LUCE: Ja?!

IVAN: Ti?!

LUCE: Eto, to su ćakule malog mista, rekla – kazala. Ma ne šetan ja, vengo kuma Marica.

JULIA: A zašto ti triba lik?

PIJER: Pije lik, jer je bokun počela zaboravjat. To dojde s godinan.

LUCE: Da ću ti ja godine, tovare stari. Oli je zabranjeno zaboravjat.

PIJER: A ni, ni.

IVAN: Eto, judi moji ćakula spaja, ali i razdvaja. Zato, pamet u glavu, naša štorija je sritno skončala, ali višje puti izgubite prave jude koje volite i koji vole vas.