Osnovna škola "Grohote" Grohote

NONA I BERA

Ispričat ću van ništo obo mojuon noni, kal je ona bila mola, i kako se živilo u njiezino doba.

Ni van onda bilo ko danas. Ni  bilo ni televizije. I če su onda judi činili!? Okupjali su se u fameji i jedni s drugima razgovorali. A puno putih ni bilo kal razgovorat se. Uvik  je bilo lavura i vajalo je hodit za poslon, bez prigovora.

Moja nona, njiezina fameja, imali su Slatine, to je jelna gora na muoru. Kal su dica hodila u Slatine, ni ni tamo vej kako je bilo, u današnje vrime tamo je ugostitiejstvo, nisu hi vozili autima. Je mogo te odvest taksi, baš! Ne, ne, hodilo se na konjima ili na mazgami. Sa svake stronie samora bi se stavilo po kašetu od višonj i u njima bidu sedila dica,  veće njih. Mlaji su sedili na starijima. Otac ili nuono bi sie intrešije, meju dvi kašete i goni konja.

Tako su u mojie none imali jednu kobilu Beru. Jedon put, a bilo je lito, užjahola nona i njiezina sestra na Beru. Kobili su pol riep i okolo riepa nasrćole  muhe i nervožitale je. Kako  je beštija mohnula riepuon, tako je moju nonu i njiezinu sestru rasprtila i razbocila u smrič.  Da van je to bilo vidit kal su izošle iz smriča! Bile su sve izgrabušone i isfrižone, pogotovo po nogami.

Nona se sidila i nagovorala oca: „Moća olma  vu Beru prodat.“

A govori njon sestra: „Ma niećemo, ni ona zla, a ni ni kriva da su njon duošle muhe. Ne smimo je prodat jer nan ona  puno  služi. Služi nan za nosit drva, je tako…za orat…za užjahot kal se umoriš! I če bismo mi bez Bere!"

I tako je Bera ostala. Za rej pravo, ni otac ni misli prodat Beru, ni non život sposilo to če je  sestra govorila. I moja je nona do malo vrimena zaboravila kako je Bera bila razbocila u draču i kako je ona ograbušala noge. Ma Bera ni nikal zaboravila kako je nona tila prodat. To non je zapontila. Čin bi non se nona približila, Bera se počiela hulit. Širila je nuozdrve, kopala kopiton  ispol sebe, zabacivola glovuon, strahota je to bila za vidit! Nona bi olma utekla, jer da ni – Bera bi počiela hizot. Inšoma, vej nona ni užjahola no nje.

A vajalo je duoć u Slatine i iz Slatin! I da nisu imali jednu ugotu Muoricu, hodila bi nona nanoge. A ovako – jahola je na Muorici.  Put  u Slatine i iz Slatin veće je duro, ma je bi sigur.

Diguol bi se Muorica zakapricjala i ukopala u mistu. Ne bi se pomakla da non doš Boga!

Možeš ti nju badot, turnivat, loskat, strašit, činit ča te voja. Ona somo obrne glovu, njonka te ne gledo. A kad non paso kapric, soma se uputi i grie naprid. Nona se nikad ni žardala potužit na Muoricu, da non ne bi palo na zlo, ko s Beron.

Tako van je to nikad bilo. Živilo se bez puno piniez, a opet lipo. Dica i njihovi roditeji puno su rodili u gori. Ni  bilo piniez za školovot se. Sve če bilo važno dica su naučila u kući, a nojveće i nojvažnije – kako bit čovik.