ŠTORIJA O ISTRIJONSKEMU VOZU
Autor: Sanja Škopac, 25. 11. 2018.
Lepo je non va Produženemu boravku, ma najviše nas pježo kad ki pride va gosti... Va petak, na 24. martinščaka 2018. leta prišla je non jena joko posebna i draga peršona – Dalibor Vozila, otac od našega Ivana. A zoc?!? Perke ta šlovek ima cuda tega lepega za gonat, a još više tega za pokozat...Ne samo ca navigo cuda let i ca je oboša celi svet, va svoje libero vreme na brode, on van dela i vozi, provi moli istrijonski vozi...i to od materijola ca nojde va svojemu drugemu doma, na brode. Pravi non je on zoc su ljudi nekadar duperali voz, koko so hi delali, navadi nas je porti od voza...Ma anke, koko je i zoc on som pošne delat ti vozići i od kudar mu ljubof za ta meštjer. Da mu ne bude štufo i vajka sejno, dela on i istrijonsko ordenje – vile, grablje, koseri, saponi, kombe, jormi, spone, krbe, ma sacega...anke i boškarini...Za ne verovat ca se šlovek more storit kad ima vredne ruke, pacijencu i kad ga nosi ljubof za istrijonski kroj i užonci. A mi deca, mi smo uživali va sakemu hipu, va sakoj besedi i sakoj štoriji našega gosta. Cuda smo tega videli, cuda tega navadili, a nesmo se rivali zapoštat...
Ma ki zno, forši će i ki od nas jenega dneva noć ljubavi i veselja za toko co storit...
I za kroj...
Velo, velooo fala Daliboru ca je noša lazno i priša non prežentat i pokozat koko se delaju vozi, ordenje, blogo...se ono bez cega istrijonski šlovek nekadar ni moga živet.
deca 3. grupe Produženega boravka
i maještra Marijana
