MOTETOVI MUŠKETIRI VA „DJEČJOJ REDUTI“
Autor: Sanja Škopac, 13. 2. 2019.
I VO LETO CUDA SMO PENSALI, KOKO BIMO SE ZA VA KRABULJI PARIĆALI. MA NAJZOD SMO SE DOGONALI, MONTURI OD MUŠKETIRI SMO KLALI. PRODUŽENI BORAVAK SMO VAN MI, OD MATIJA VLACIĆ ŠKOLI SMO PRIŠLI. LEPI, KUNTENTI I CAGODAR SMO SI, ZA MUNJESAT I TONCAT VAJKA PRONTI SMO MI!!!
Va subotu, na 9. febraja 2019. leta bili smo va „Dječjoj reduti“ ko je parićala Labinjonska kompanija – domoća folšarija. I vo leto bili smo vela kompanija – 68 dece i maještri od Produženega boravka.
Jušto na polne portilo se od štacijona za korijeri kontro Zelenicah, kede se je saka kompanija krabuljah prežentala. Koko nan je bilo, ne robi preveć gonat, perke litrati će van jušto se pokozat...
Ma, inšoma, oteli bimo se zafolit semi ki su nan pomogli da toko lepo prežentomo Produženi boravak naše školi.
Fala Jasni Tonello ka nan sako leto pronto materijol za monturi i reže nan ga na meru, jušto koko non robi. Velo Van fala za si piaceri ca ste za nas storila i na soj pacijenci. Robilo je to zdurat...
Cuda, cuda fala Leu Knapiću ka je za seh nas stori oni lepi križi keh smo imali na monturah. Ni mu bilo propjo lahko, ma on je se rivo parićat na vreme...
I za kroj, fala semi ki ste pomogli delat monturi za krabulji – fala mame, fala ćaće, none, noneti, cije, cijeti...Fala ca ste nas kapili, ca ste bili vredni, žvelti, ca ste nas kapili i pacentali – od pocetka do somega kraja...
Fala van ca ste bili...SI ZA JENEGA, JEDON ZA SEH!!!
Cuda vas seh imamo radi...
MOTETOVI MUŠKETIRI
