Osnovna škola Matije Vlačića Labin

Eko, da napišemo i por rigah za današnji don, utorak, 26.martinjšćaka 2024.leta… I da von se pofolimo…da smo imeli jeno lepo jutro va sale Gradske knjižnice Labin. Ne, ne…nesmo šli gledat, iskat libri, nesmo šli …nic delat…skoro pa nic… Samo smo cuda uživali, cuda se smejali, po domoće gonali, poslihali, kantali, a najraje bimo bili i zatoncali… Za dobro jutro docekala nas je Roberta Razzi, jena štabela labinjonska ženska ka cuda tega lepega dela, ma anke i piše versi na labinjonskoj cakavici. Pravila non je cuda stvorah, navadila nas neke nove i neke store besedi po domoće i preštela svoji versi o najlepcemu mesecu va lete ka je pred nami – o Božićnjaku. Vreme š njo non je proletelo koko zgoret, perke ona ima cuda tega za pravit, a nas… se pježo znat. Ona non je za kroj najovila i neku panu, neki cukar na koloci… I prišla je …Prišla non je ona…Elis Lovrić, ta šinjora ke smo se joko veselili, ko nesmo mogli docekat, perke smo va škole vadili i jeno njeno kancono, ko vajk s gušton zakantomo kad god ćepomo lazno…prišla non je ta naša vela vila od mužiki ka je labinjonsku cakavicu ponesla po celemu svetu, anke i do Japona. I š njo smo si malo gonali, sacega je pitali, perke smo joko jokooooo kurjoži… Ma sejno, najviše nas je razveselila kad je va ruke zela kitaro, zasopla, i pocela kantat… …kad vecer legnen pod zvezdi moje ja se domislin kad son bila mola i cujen odor od mojega mora i voce zapren usta upren i zaspin na miru spin…. …Ta, prelepi…Kanat od mora… I ne, ne…ni nas robila vadit besedi od kanconi, perke mi hi već znomo… A kantat z Elis, to je bi jedon prelepi, poseban gušt, nanke ne znote kakov… Propjo non je šlo…od sega grla…😊 Pomalo je prišlo i vreme za tornat se va školo. Ni non se hodelo nanke malo, ma Elis non je obećala da ćemo se videt još ka put i zakantat skupa. Mi je cekamo, z velin veseljen… I ca još reć za kroj?!? Nego… Bilo non je…CAGODAR… Fala šinjori Loredani i Grodu Labinu ki so non to organizali. Fala našemi velemi ženskami, našin Labinjonkami Roberti i Elis ca su nošle lazno za nas i dole non cuda lepih štorijah ca kroz besedu ca kroz mužiku. VELO von FALAAAA….