ĆAKULODI NA OGNJIŠĆE
Autor: Tajana Kovačić, 16. 12. 2024.
Petak trinajsti, brrrrrrrr..! ! ! Puno ljudi ćepeva stroh od tega dneva, a oni ki so propijo praznovjerni, na ta don nanke ne rejo vonka s kući. Med nami – anka mi smo provali noć neki drugi puntament. Smo si ga pensali: „Ne išćimo vraga ku ne moramo!“ Ali, ca se trefilo? Spametili smo se da je danaska i Sveta Lucija, a ona je zaštitnica svetla i non broji 12 dni do Božića…A Božić je cagodar za seh. Kako vervamo da dobro vajka dobije grdo, mi ne samo da smo šli vonka od kući, nego i vonka od školi i finili va Ripende, va Lovačken dome, kede smo ćakulali, kantali i toncali po naše. A zoš? Zato jer smo oteli pokozat ca smo se delali i navadili kroz naš projekt „Ćakulodi na ognjišće“ s ken smo poceli još va devetemu mesecu. Obećali smo da ćemo cuvat užonci našega kraja i domoćo besedo. Ki je se bi va konobe poli ognjišća? Si treti razredi naše školi i od Rapca, ma anke i treti razredi školi Ivo Lola Ribar i od Vineža. Školoni i njihove maještri so imeli malo rigvorda ko će se pasat dobro, parke tamo je bi naš podeštot Valter Glavičić i veli ljudi od Groda, Borjan Batagelj i Loredana Ružić Modrušan. Prišli so i đornalisti i fotografi. Konoba je bila puna koko šipak, tako da forši nesmo nanke seh dobro videli. A kako je finila ta prezentacija? Kako je danaska Sveta Lucija, po užonce smo posejali cenico ka će non siguro parnes srećo i zdrovlje va nove lete, samo ko je dobro tendimo. O te užonce nan je provljivala maeštra Sanja Štucin od Vineža. A kokova bi to fešta bila bez jes i pit?!? Tete Marina i Loredana su nan prontale domoći kruh, bakaloj, sir, domoće ulje, kroštuli i cukarinčići – onako kako su to delali naši stori. Projekt je finjen, ma mi gremo napred. Nećemo pustit da se naši užonci zataro. Na labinjonskoj cakavice ćemo gonat, kantat, toncat i škercat. Receti od našeh noni ćemo spravit, puno ubedi i veceri storit, onako kako su one užale. I ca da von još pravimo?!? Koko non je bilo?!? Ma propjo…CAGODAR!!! Maeštri: Marijana Blašković, Dilana Dagostin Mohorović i Doris Golja
